ढुंगेदेउरालीलाई लामाचौर कप भलिबल उपाधि अन्तर मावि छात्रातर्फ शान्ता विजयी

भदौ १०, पोखरा

ढुंगेदेउराली क्लबले रारा लामाचौर कप खुला पुरुष भलिबल प्रतियोगिताको उपाधि जितेको छ ।

नवआदर्श सामुदायिक विकास समाजको आयोजनामा मंगलबार फाइनलमा जिएम समाज कावासोतीलाई ३/२ को सेटमा पराजित गर्दै उपाधि सहित नगद ३ लाख जितेको हो । उपविजेताले १ लाख ५० हजार प्राप्त गरेको छ ।

खेलमैदान खचाखच दर्शक माझ अत्यन्तै प्रतिस्पर्धात्मक खेलमा पहिलो सेट गुमाएको भए पनि स्याङ्जा पौवे गौडे ढुंगेदेउरालीले २२/२५, २५/१८, २५/२७, २६/२४ र १५/१२ को कडा प्रतिस्पर्धामा उपाधि कब्जा जमाउन सफल भएको हो ।

चौथो सेट २४–२४ को रोमाञ्चक मोडमा पुगेकोमा सञ्जु विक्रम शाह कप्तानीको ढुंगेदेउरालीले विपक्षीलाई रोकेको थियो । पुरुष ततर्फ ढुंगेदेउरालीका सफल बिक सर्वोत्कृष्ट खेलाडी घोषित भए । उनले १० हजार पुरस्कार पाए । उनी फाइनलमा म्याच अफ दि म्याच पनि बने । विधागत पुरस्कारमा ढुंगेदेउरालीले वर्चश्व जमाएको थियो ।

बेस्ट स्पाइकर सञ्जुविक्रम शाह, बेस्ट डिफेन्डर राजन दर्लामी, बेस्ट सर्भर किसान गुरुङ, इमर्जिङ प्लेयर सुगम सुनार र बेस्ट कोच विक्रम नेपाली भए । जिएम समाजका विवश आले बेस्ट सेटर र हिमाल सुनारी बेस्ट ब्लकर घोषित भएको नेपाल भलिबल संघ केन्द्रीय उपाध्यक्ष यामबहादुर गुरुङले जानकारी दिनुभयो । ढुंगेदेउराली लिग चरणमा समूह ‘ए’ को उपविजेता हुँदै सेमिफाइनल पुगेकोमा एपिएफ पोखरालाई सोझो सेटमै पराजित गरी फाइनलमा जिएम समाजसँग भेट सुनिश्चित गरेको हो ।

जिएम समाजले पहिलो सेमिफाइनलमा समूह ‘ए’ को विजेता आयोजक नवआदर्श सामुदायिक विकास समाजको चुनौती सोझो सेटमै पन्छाउँदै फाइनल पुगेको थियो । यसैगरी, लामाचौर कप अन्तरमावि छात्रा भलिबल प्रतियोगिताको उपाधि शान्ता माविले जितेको छ । फाइनलमा टप्स माविलाई ३/१ सेटमा पराजित गर्दै उपाधिसहित नगद १ लाख जितेको हो । उपविजेताले ५० हजार पुरस्कार प्राप्त गरेको छ । टप्सले पहिलो सेट आफ्नो पक्षमा पारेको थियो । तर शान्ताले एकाएक रणनीतिक खेल खेल्दै २२/२५, २५/६, २५/१३ र २५/१४ सेटमा उपाधि जितेको हो ।

बेस्ट प्लेयर शान्तकी पृथ्वी गाह बनिन भने शान्तकै अपेक्षा बिक बेस्ट स्पाइकर, अस्तर राई बेस्ट सर्भर, प्रमिला नेपाली बेस्ट ब्लकर, एलिना गुरुङ बेस्ट लिबेरो, टप्सकी एलिजा आले बेस्ट सेटर घोषित भए । बेस्ट कोच शान्तका दिनेश चौधरी र राइजिङ प्लेयर पोखरा युनाइेटेडकी यमुना थापा बने ।

नवआदर्शले संस्थाको २९ औं वार्षिक समारोह एवं तीज अवसरमा २७ औं संस्करणको लामाचौर तीज महोत्सवअन्तर्गत लामाचौर कप आयोजना गरेको हो । सो अवसरमा खेलकुदसहित विविध सांस्कृतिक एवं सांगीतिक कार्यक्रम भएको अध्यक्ष इ. दिनेश भण्डारीले बताउनुभयो ।