पौष २१, पोखरा
जिल्ला प्रशासन कार्यालय कास्कीले एकै परिवारका तीन जनालाई आमाको नामबाट नागरिकता प्रदान गरेको छ ।
कास्कीको अन्नपूर्ण गाउँपालिका–८ बस्ने निरुता नेपाली का दुई छोराहरू सुजन, दिनेश नेपाली र एक छोरी सुस्मिता नेपालीलाई आमाको नामबाट नेपाली नागरिकताको प्रमाणपत्र दिलाइएको सहायक प्रमुख जिल्ला अधिकारी चित्राङ्गत बरालले जानकारी दिनुभयो ।
बाबु नानीहरूको नागरिकता सम्बन्धी विषयमा स्थानीय तहसँगको समन्वय र जिल्ला प्रशासन कार्यालयको सहजीकरणमा उनीहरूको जन्मदर्ता गराई आमाको नामबाट नेपाली नागरिकता उपलब्ध गराई समस्याको समाधान गरिएको सहायक प्रमुख जिल्ला अधिकारी बरालले जानकारी दिनुभयो।
बुबाको पहिचान हुने कुनै कागजात र प्रमाण पेस हुन नसकेको अवस्थामा अन्नपूर्ण गाउँपालिका–८ ले वडाको मुचुल्का प्रहरीको मुचुल्का गरी जन्मदर्ता प्रमाणपत्र उपलब्ध गराइएको र सोही वडा कार्यालयको सिफारिस आधारमा नागरिकता ऐन, नियमावली र नागरिकता वितरण कार्यविधि बमोजिमका प्रमाण तथा तथ्यका आधारमा आमाको नामबाट नागरिकताको प्रमाणपत्र प्रदान गरिएको थियो ।
प्रतिक्रिया