फागुन ८, काठमाडौं
दाङमा राष्ट्रिय स्वतन्त्र पार्टीका नेता तथा कार्यकर्ताले नेकपा एमालेको झण्डा जलाएपछि नेसनल भोलेन्टियर्स फोर्सले आपत्ति जनाउँदै प्रतिवादमा उत्रिने चेतावनी दिएको छ।
नेकपा एमालेको लडाकु दस्ता नेशनल भोलेन्टियर्स फोर्सले राष्ट्रिय स्वतन्त्र पार्टीविरुद्ध प्रतिवादमा उत्रिने चेतावनी दिएको छ । फोर्सले रास्वपाका शीर्ष नेताले एमाले नेतृत्वमाथि अनावश्यक लाञ्छना लगाएको र हिजो दाङमा आफ्नो पार्टीको झण्डा समेत जलाइएको भन्दै कारवाहीको माग गरेको छ ।
नेसनल भोलेन्टियर्स फोर्सले झण्डा जलाउने र आफ्नो नेतृत्वमाथि लान्छना लगाउनेमाथि प्रशासनले कारबाही नगरे प्रतिवादमा उत्रिने चेतावनी दिएको हो । फोर्सका प्रमुख कमाण्डर पुष्पराज श्रेष्ठले शुक्रबार वक्तव्य जारी गर्दै सो चेतावनी दिनुभएको हो।
फोर्सले झण्डा जलाउने,उत्तेजना फैलाउने र द्वेष भड्काउने कार्यलाई अराजक मानसिकताको प्रतीक भन्दै यस्ता कार्यमा संलग्न व्यक्ति माथि राज्य संयन्त्रले कारवाही नगरे अराजकहरूलाई कारबाही गर्न सशक्त प्रतिवाद गर्ने चेतावनी दिएको हो ।
प्रतिक्रिया