साउन ८ , पोखरा
कास्की प्रहरीले पोखरा महानगरपालिका–२६, बिजयपुर क्षेत्रमा अवैध रूपमा प्राकृतिक दोहन (माटो उत्खनन) गरिरहेको अवस्थामा १ वटा स्काभेटर र ३ वटा टिपर नियन्त्रणमा लिएको छ।
जिल्ला प्रहरी कार्यालय कास्कीका अनुसार बिहीबार दिउँसो करिब १:३० बजे अवैध रूपमा माटो उत्खनन भइरहेको भन्ने सूचनाका आधारमा प्रहरी टोली घटनास्थल पुगेको थियो। त्यस क्रममा माटो लोड गर्दै गरेको अवस्थामा १ वटा जेसीबी (स्काभेटर) र ३ वटा टिपरलाई नियन्त्रणमा लिइएको हो।
नियन्त्रणमा लिइएका सवारीसाधनलाई आवश्यक कारबाहीका लागि पोखरा महानगरपालिकाको कार्यालयमा पठाइएको प्रहरीले जनाएको छ। महानगरपालिकाले ती सवारीसाधनमाथि रु. ७५ हजार जरिवाना गरी छाडिएको जनाएको छ।
प्रहरीका अनुसार नियन्त्रणमा परेका सवारीसाधनहरूमा ग १ क ३७८८ नम्बरको स्काभेटर, ग १ ख ७७६६ नम्बरको टिपर, बा १ क ८१३७ नम्बरको टिपर र लु १ ख २१२० नम्बरको टिपर रहेका छन्।
जिल्ला प्रहरी कार्यालय कास्कीले प्राकृतिक स्रोतको अवैध दोहन तथा उत्खननविरुद्ध निगरानी र कारबाहीलाई आगामी दिनमा पनि निरन्तरता दिइने जनाएको छ।
प्रतिक्रिया