जेठ १५, पोखरा
पोखराको आकाशमा निरन्तर पानी परिरहेको थियो। सडक किनारमा डोजरहरूको आवाज गुञ्जिरहेको थियो। महानगरको सार्वजनिक जग्गा संरक्षण र अवैध संरचना हटाउने अभियान तीव्र बनिरहेको यही समयमा पोखरा महानगरपालिका वडा नं. ८ मा भने एउटा निकै मार्मिक दृश्य देखियो।
“कानुन सबैका लागि बराबर हुन्छ” भन्ने सन्देशलाई व्यवहारमै उतार्दै वडा अध्यक्ष रुद्रनाथ बराल आफैँ डोजर लिएर बराल समाज घर तथा क्रियापुत्री भवन हटाउने कार्यमा सहभागी हुनुभयो। उक्त भवन सामाजिक तथा धार्मिक कार्यका लागि निर्माण गरिएको थियो, जसमा बराल समाजका सदस्यहरूको वर्षौँको श्रम, योगदान र भावनात्मक सम्बन्ध जोडिएको थियो।
हिजोसम्म आफ्नै कुल–कुटुम्ब, दाजुभाइ र समाजको रगत–पसिना ले बनेको भवन आज कानुन कार्यान्वयनका नाममा हटाउनु पर्ने अवस्था आउँदा त्यहाँ उपस्थित धेरै सदस्यहरूको आँखा रसाएका थिए। कतिपयले भावुक हुँदै भवनतर्फ टोलाइरहेका थिए भने वडा अध्यक्ष बराल पनि निकै गम्भीर मुद्रामा देखिनुहुन्थ्यो।
स्थानीयहरूका अनुसार सार्वजनिक क्षेत्र संरक्षण तथा मापदण्ड विपरीत बनेका संरचना हटाउने क्रममा आफ्नै समाजसँग जोडिएको भवनमाथि पनि समान रूपमा कानुन लागू गर्नु नेतृत्वको साहसिक निर्णय हो। धेरैले यसलाई “आफ्नो र परायो नभनी कानुन कार्यान्वयन गर्ने संस्कार” को उदाहरणका रूपमा लिएका छन्।
राजनीतिक तथा सामाजिक दबाबका बीच पनि निष्पक्ष रूपमा निर्णय लिनु सजिलो विषय होइन। तर वडा अध्यक्ष बरालले आफ्नो व्यक्तिगत सम्बन्धभन्दा माथि उठेर कानुनी शासनलाई प्राथमिकता दिएको भन्दै स्थानीय तहमा उहाँको कदमको प्रशंसा भइरहेको छ।
पोखरामा बेला–बेला सार्वजनिक जग्गा अतिक्रमण, मापदण्ड विपरीत संरचना निर्माण र पहुँचवालालाई छुट दिने प्रवृत्तिमाथि प्रश्न उठ्ने गरेका छन्। यस्तो अवस्थामा आफ्नै समाजको भवनमा समेत कानुन लागू गरेर वडा नं. ८ ले एउटा बलियो नजिर स्थापना गरेको स्थानीयहरूको भनाइ छ।
यो घटना केवल एउटा भवन भत्काइएको समाचार मात्र होइन, कानुनको अगाडि सबै बराबर हुन्छन् भन्ने सन्देशको जीवित उदाहरण पनि बनेको छ। कठिन निर्णय लिन सक्ने नेतृत्व नै वास्तविक नेतृत्व हो भन्ने अनुभूति पोखरा–८ को यो घटनाले फेरि एकपटक गराएको छ।
प्रतिक्रिया