जेठ ३१, पोखरा
गण्डकी प्रदेशमा राष्ट्रिय स्वतन्त्र पार्टीको प्रथम अधिवेशनबाट नवीन त्रिपाठीको अध्यक्षतामा नयाँ समिति गठन भएको छ ।
अध्यक्ष पदका तीनजना उम्मेदवारलाई पछि पार्दै नवीन त्रिपाठी विजयी भएको हो । अध्यक्ष पदका लागि नवलपुरका राजन गौतम, माधवप्रसाद कँडेल र हरिबहादुर कार्कीलाइ हराउदै ५० प्रतिशत भन्दा बढी मत ल्याएर त्रिपाठी विजयी हुनु भएको हो ।
निर्वाचनबाट सदस्यहरु मध्यबाट पदाधिकारीमा उपसभापति बागलुङकी मिना शर्मा आचार्य, महामन्त्रीमा कास्कीका कृष्णप्रसाल लम्साल, सहमहामन्त्रीमा तनहुँका शंकर पन्त र नवलपुरकी सिताकुमारी अर्याल निर्विरोध निर्वाचित हुनुभएको हो।पदाधिकारी मा एउटा पदमा एक जनाको मात्र नाम परेपछि निर्वाचन समितिले निर्विरोध निर्वाचित घोषणा गरेको थियो ।
रास्वपाको विधान अनुसार पहिलो चरणमा निर्वाचित सदस्यहरु मध्येबाट पदाधिकारी मनोनय दर्ता गर्ने प्रावधान छ । सोही अनुसार शनिबार पहिलो चरणको निर्वाचनबाट निर्वाचित ३३ सदस्यबाट पदाधिकारी निर्विरोध भएका हुन् । यदि एउटा पदमा २ वा २ भन्दा बढि उम्मेदवारी परेमा पुनः दोस्रो चरणको निर्वाचन गर्नुपर्थ्यो ।
दोस्रो चरणको निर्वाचनमा पनि सबै (गण्डकीका प्रतिनिधि ७ सय ८०) प्रतिनिधिले मतदान गर्नुपर्थ्यो । निर्वाचन नगरी गण्डकीको पदाधिकारीमा सर्वसम्मत गरिएको एक नेताले बताए । कार्यसमिति ले पछि ४ जना सदस्य मनोनीत गर्न पाउने विधानमा व्यवस्था छ ।
प्रतिक्रिया